క్యాండీ క్రష్ గేమ్‌లో ప్రపంచ రికార్డ్.. 22,222వ లెవెల్ దాటిన బీహార్ కుర్రాడు!

కాలక్షేపం కోసం ఆడే మొబైల్ గేమ్‌తో ఓ యువకుడు ఏకంగా ప్రపంచ రికార్డునే సృష్టించాడు. అత్యంత ప్రజాదరణ పొందిన 'క్యాండీ క్రష్ సాగా' పజిల్ గేమ్‌లో ఏకంగా 22,222వ లెవెల్ పూర్తి చేసి అందరినీ ఆశ్చర్యపరిచాడు. ఈ అరుదైన ఘనత సాధించినందుకుగానూ బీహార్‌కు చెందిన 19 ఏళ్ల శుభం కుమార్ పేరు 'ఇంటర్నేషనల్ బుక్ ఆఫ్ రికార్డ్స్‌'లో నమోదైంది. ప్రస్తుతం ఈ వార్త సోషల్ మీడియాలో వైరల్‌గా మారింది.

బీహార్‌లోని దిగ్వారా ప్రాంతానికి చెందిన శుభం కుమార్.. శివాన్‌లోని ప్రభుత్వ ఇంజినీరింగ్ కళాశాలలో విద్యనభ్యసిస్తున్నాడు. అతను ఈ ఏడాది జులై 5వ తేదీ నాటికి క్యాండీ క్రష్ గేమ్‌లో 22,222వ లెవెల్‌ను విజయవంతంగా పూర్తి చేశాడు. ఆ సమయానికి అతని వయసు 19 సంవత్సరాల 8 నెలల 25 రోజులు. దీంతో 'క్యాండీ క్రష్ సాగాలో అత్యధిక లెవెల్ సాధించిన టీనేజర్' విభాగంలో ఇంటర్నేషనల్ బుక్ ఆఫ్ రికార్డ్స్ అతనికి అధికారికంగా గుర్తింపునిచ్చింది.

రంగురంగుల క్యాండీలను జత చేస్తూ లెవెల్స్ దాటడమే ఈ గేమ్‌లోని ప్రధాన అంశం. లెవెల్స్ పెరిగే కొద్దీ ఆట కఠినంగా మారుతుంది. అయితే, శుభం కుమార్ ఈ రికార్డు సాధించాక కూడా ఆటను ఆపలేదు. ప్రస్తుతం తాను 23,000వ లెవెల్‌ను కూడా దాటినట్లు తెలిపాడు. ఈ ఘనత గురించి తెలిసిన నెటిజన్లు ఆశ్చర్యం వ్యక్తం చేస్తున్నారు. 

ఇంత ఓపిక, ఏకాగ్రత ఎలా సాధ్యమైందని కొందరు కామెంట్లు పెడుతుండగా, ఈ లెవెల్‌కు చేరుకోవడానికి ఎంత స్క్రీన్ టైమ్ పట్టి ఉంటుందోనని మరికొందరు సరదాగా వ్యాఖ్యానిస్తున్నారు.

ఒకవైపు ఇంజినీరింగ్ లాంటి కష్టమైన చదువు చదువుతూనే, మరోవైపు గేమ్‌లో ఈ స్థాయిలో రాణించడంపై పలువురు అతన్ని అభినందిస్తున్నారు. ఈ అరుదైన విజయం సాధించినందుకు బీహార్ రాష్ట్ర సైన్స్, టెక్నాలజీ, టెక్నికల్ ఎడ్యుకేషన్ విభాగం కూడా శుభం కుమార్‌ను అభినందించడం విశేషం.